тура бағыттай атыс

(Стрельба прямой наводкой)

зеңбірек тікелей нысанаға бағытталған жағдайда, ашық атыс позициясынан артиллериялық зеңбіректен атыс жүргізу. Т.б.а. үшін бөлінген артиллериялық зеңбірекке төмендегі міндеттер жүктелуі мүмкін: қарсыластың шабуылдаушы танкілері мен жаяу әскерлерін жою (тойтару); ұзақ мерзімді және далалық қорғаныс құрылыстарын қирату; әр түрлі құрылыстарда тасаланған атыс құралдары мен адам күшін жою; танкілерге және жаяу әскерге қарсы бөгеттерді қирату; су бетіндегі нысаналарды және т.б. жою. Т.б.а. әр түрлі калибрдегі зеңбіректерден жүргізіледі, ату қашықтығы, әдетте, 500—1500 м, ал кейбір жағдайларда одан да жоғары. Т.б.а-пен жоғары тиімділікке және атыс міндеттерін қысқа мерзімде орындауға қол жеткізіледі. Мыс., 2 км қашықтықтағы жабық атыс позициясында 122-мм келте зеңбірекпен атыс кезінде блиндажды қиратуға 40 снаряд қажет, ал әрбір жарылысты бақылауға мүмкіндік болмаған жағдайда 150-ден астам снаряд қажет. Т.б.а-пен осы міндетті орындау үшін 1—3 рет дәл тигізу жеткілікті.